Ҳужумчи Пауло Дибала мавсум якунланганидан кейин «Рома»ни тарк этади. ESPN нашрининг ўз манбаларига таяниб хабар беришича, Дибала ватанига қайтади — у «Бока Хуниорс» клуби билан дастлабки келишувга эришиб бўлган.
32 ёшли Дибала «Бока Хуниорс» сафига эркин агент мақомида бепул ўтади. 2025/2026 йилги мавсумда Пауло Дибала «Рома» либосида 23 та расмий ўйинда майдонга тушиб, ўз ҳисобига 3 та гол ва 4 та голли узатмани ёздириб қўйди.
Таъкидлаш жоизки, аргентиналик футболчи анча вақтдан бери — 2012 йилнинг ёзидан буён Италияда тўп суриб келмоқда. Италия футболидаги фаолияти давомида у «Палермо», «Ювентус» ва «Рома» клублари шарафини ҳимоя қилган.
