Мадриднинг «Атлетико» клуби бош мураббийи Диего Симеоне ҳужумчи Хулиан Альвареснинг жароҳати ҳақида фикр билдирди.
Аргентиналик форвард Чемпионлар лигаси биринчи ярим финали доирасидаги «Арсенал»га қарши баҳснинг 56-дақиқасида пенальтини аниқ амалга ошириб, якуний ҳисобни (1:1) ўрнатган эди. Бироқ 77-дақиқада футболчи жароҳат туфайли алмаштирилишни сўради ва унинг ўрнини Алекс Баэна эгаллади.
«Альварес жавоб ўйинида майдонга тушишга албатта тайёр бўлади», — деди Симеоне журналистлар билан суҳбатда.
Қарама-қаршиликнинг ҳал қилувчи учрашуви 5 май куни «Эмирейтс» стадионида бўлиб ўтади. Ғолиб жамоа финалда «ПСЖ» ёки «Бавария» билан куч синашади.
