«Эльче» клубида ижара асосида тўп сураётган ўнг қанот ҳимоячиси Эктор Форт яна «Барселона» ихтиёрига қайтади.
Sport нашрининг хабар беришича, 19 ёшли футболчи мавсум олди тайёргарлик жараёнида бош мураббий Ханс-Дитер Фликка асосий таркибга лойиқлигини исботлаш имкониятига эга бўлади. Шундай бўлса-да, Каталония гранди ўз тарбияланувчисини яна бошқа жамоага ижарага бериб юбориши ҳам истисно этилмаяпти. Футболчининг келажаги кўп жиҳатдан жамоанинг мудофаа чизиғидаги умумий ҳолат ва бошқа футболчиларнинг трансферларига боғлиқ бўлади.
Маълумот ўрнида, жорий мавсумда Эктор Форт «Эльче» сафида барча мусобақаларда 13 та ўйинда майдонга тушди. Ушбу баҳсларда ҳимоячи ўз ҳисобига 2 та гол ва 2 та голли узатмани ёздириб қўйишга муваффақ бўлган.
Эслатиб ўтамиз, испаниялик истеъдодли футболчининг «Барселона» билан амалдаги меҳнат шартномаси 2029 йилга қадар мўлжалланган.
