Мадриднинг «Реал» клуби собиқ яримҳимоячиси Тони Кроос жамоанинг янги бош мураббийини танлаш жараёнида муҳим рол ўйнаши мумкин. «Қаймоқранглилар» раҳбарияти айни дамда Альваро Арбелоанинг ўрнини босиш учун асосий номзод сифатида Юрген Клоппни кўрмоқда.
Асосий муаммо шундаки, «Ливерпуль»нинг собиқ устози 2024 йилда мураббийлик фаолиятини тўхтатган ва ҳозирда «Red Bull» тизимида фаолият юритмоқда. Журналистлар Хоакин Марото ва Рамон Альвареснинг хабар беришича, Тони Кроос Клоппни «Реал» таклифини қабул қилишга кўндиришга уринмоқда.
Манбанинг таъкидлашича, агар Клопп мураббийликка қайтишга рози бўлса, бу фақат «Реал» учун содир бўлиши мумкин. Тони Кроос мураббийнинг қарори ижобий эканини билган заҳоти, Мадрид клуби расмий музокараларни бошлайди.
Тони Крооснинг ўзига келсак, унинг тақдири аллақачон ҳал бўлган: ЕЧЛнинг олти карра ғолиби мавсум якунланиши билан «Реал» структурасида раҳбарлик лавозимларидан бирини эгаллайди. Бу ҳақда Ла Лига баҳслари якунига етгач, расман эълон қилиниши кутилмоқда.
