Таниқли мутахассис Юрген Клопп «Ливерпуль» ҳужумкор ярим ҳимоячиси Флориан Вирцнинг келажаги ва олдинда турган Жаҳон чемпионатидаги иштироки ҳақида ижобий фикрлар билдирди. Германия терма жамоаси аъзоси бўлган 22 ёшли футболчи шу ёзда бўлиб ўтадиган мундиалда иштирок этади.
«Умид қиламанки, Вирц ажойиб Жаҳон чемпионатини ўтказади. Менимча, унда энг зўр футболчи бўлиб етишиш учун барча хислатлар мужассам. У оғир мавсумда ҳам қанчалик маҳоратли эканини аллақачон исботлаб улгурди», — дея Клоппнинг сўзларини келтирмоқда BBC нашри.
Маълумот ўрнида, Флориан Вирц жорий мавсумда клуб миқёсида жами 46 та учрашувда майдонга тушиб, ўз ҳисобига 7 та гол ва 10 та голли узатмани ёздириб қўйди.
Эслатиб ўтамиз, ЖЧ-2026 гуруҳ босқичида Германия терма жамоаси Кюрасао, Кот-д’Ивуар ва Эквадор терма жамоаларига қарши баҳс олиб боради.
