Испания Конгресси депутатлари Ла Лиганинг қароқчиликка қарши кураши сабабли сайтларнинг оммавий равишда блокланиши муаммосига муносабат билдиришни бошладилар. Democrata порталининг хабар беришича, бундай блоклашлар кўпинча нафақат ноқонуний ресурсларга, балки оддий ва қонуний ишлайдиган сервисларга ҳам таъсир қилмоқда.
Парламент комиссияси IP-манзилларни «фарқламасдан» блоклашни тақиқлаш ва учинчи томонлар учун келиб чиқадиган оқибатларни ҳисобга олишни таклиф қилувчи ташаббусни маъқуллади. Шунингдек, қароқчиликка қарши чоралар янада аниқроқ бўлиши ва легал сайтларга зарар етказмаслиги учун Европанинг рақамли хизматлар тўғрисидаги қонунига ўзгартиришлар киритиш режалаштирилмоқда.
Аввалроқ, Испанияда ушбу блоклашлар туфайли баъзи фойдали хизматлар, жумладан, транспорт иловалари ва турли касалликларга чалинган инсонларга ёрдам бериш тизимлари ишламай қолган эди. Депутатлар Испания чемпионатининг ноқонуний трансляцияларига қарши курашиш зарурлигини, бироқ бу ҳар қандай ҳолатда ҳам бошқаларга зарар етказиш эвазига бўлмаслиги кераклигини таъкидламоқдалар.
