Ispaniya Kongressi deputatlari La Liganing qaroqchilikka qarshi kurashi sababli saytlarning ommaviy ravishda bloklanishi muammosiga munosabat bildirishni boshladilar. Democrata portalining xabar berishicha, bunday bloklashlar ko‘pincha nafaqat noqonuniy resurslarga, balki oddiy va qonuniy ishlaydigan servislarga ham ta’sir qilmoqda.
Parlament komissiyasi IP-manzillarni «farqlamasdan» bloklashni taqiqlash va uchinchi tomonlar uchun kelib chiqadigan oqibatlarni hisobga olishni taklif qiluvchi tashabbusni ma’qulladi. Shuningdek, qaroqchilikka qarshi choralar yanada aniqroq bo‘lishi va legal saytlarga zarar yetkazmasligi uchun Yevropaning raqamli xizmatlar to‘g‘risidagi qonuniga o‘zgartirishlar kiritish rejalashtirilmoqda.
Avvalroq, Ispaniyada ushbu bloklashlar tufayli ba’zi foydali xizmatlar, jumladan, transport ilovalari va turli kasalliklarga chalingan insonlarga yordam berish tizimlari ishlamay qolgan edi. Deputatlar Ispaniya chempionatining noqonuniy translyasiyalariga qarshi kurashish zarurligini, biroq bu har qanday holatda ham boshqalarga zarar yetkazish evaziga bo‘lmasligi kerakligini ta’kidlamoqdalar.
