Мексика футболи афсонаси, дарвозабон Гильермо Очоа жаҳон чемпионатида иштирок этади. Бу ҳақда инсайдер Фабрицио Романо ўз ижтимоий тармоқларида маълум қилди.
Шунингдек, Романонинг таъкидлашича, Очоа турнир якунланганидан сўнг ҳам халқаро, ҳам клуб даражасида фаолиятини якунлайди. Агар кутилмаган ҳолатлар юз бермаса, мексикалик посбон ўз фаолиятидаги олтинчи жаҳон чемпионатида майдонга тушади ва бу борада Криштиану Роналду ҳамда Лионель Мессининг натижасини такрорлайди. Ҳозирда жами 8 нафар футболчи ҳисобида 5 тадан мундиалда иштирок этиш кўрсаткичи мавжуд.
Очоа 2014, 2018 ва 2022 йилги жаҳон чемпионатларида асосий дарвозабон бўлган бўлса, яна иккита турнирда захирада қолган эди. Ўз вақтида «Америка», «Малага» ва «Аяччо» каби клублардаги ўйинлари билан танилган футболчи ҳозирда Кипрнинг АЕЛ жамоаси шарафини ҳимоя қилмоқда.
