Дортмунднинг «Боруссия» клуби «Реал Мадрид» ҳужумчиси Гонсало Гарсияга даъвогарлик қилмоқда. «Арилар»нинг ҳужумчига бўлган қизиқиши ҳақида аввалроқ Испания манбалари хабар берган эди, энди эса бу маълумот Германия томонидан ҳам тасдиқланмоқда.

Машҳур инсайдер Флориан Плеттенбергнинг сўзларига кўра, Дортмунд клуби Гарсияни ўз шорт-листига киритган. Ушбу рўйхатдан, шунингдек, «Хоффенхайм» аъзоси Фисник Асллани ва «Брюгге» вакили Николо Тресольди ҳам жой олган. Шунга қарамай, ҳозирги вақтда «қаймоқранглилар» ўйинчиси бўйича расмий музокаралар олиб борилмаяпти.

Гонсало Гарсия жорий мавсумда «Реал» сафида 34 та ўйинда майдонга тушиб, 6 та гол урди ва 2 та голли узатмани амалга оширди. Transfermarkt портали 22 ёшли футболчининг трансфер қийматини 30 миллион еврога баҳоламоқда.