«Арсенал» клуби Премьер-лига чемпионлиги учун курашга халал бераётган кетма-кет жароҳатлар сабабини аниқлаш учун ташқи эксперт ёллади. The Telegraph нашрининг хабар беришича, бу вазифа испаниялик физиотерапевт Хоакин Аседога топширилган.
Хоакин Аседо бош мураббий Микель Артетанинг яқин дўсти ҳисобланади. У сўнгги ойларда жамоа атрофида тез-тез кўриниш берган.
Жорий мавсумда «канонирлар» таркибида фақат икки нафар футболчи — Мартин Субименди ва Майлз Льюис-Скелли жароҳат олмади. Қалган барча ўйинчилар маълум муддат сафдан чиқишга мажбур бўлган.
Мартин Эдегор, Кай Хавертц ва Букайо Сака каби етакчилар узоқ вақт даволанишди. Шунингдек, Микель Мерино, Юрриен Тимбер ва Риккардо Калафьори билан боғлиқ муаммолар клуб тиббиёт департаментига бўлган босимни оширган.
Клубда жароҳатларнинг олдини олиш ва тикланиш жараёнларини таҳлил қилувчи доимий ички тизим мавжуд бўлса-да, ҳозирги ҳолат қўшимча текширув ўтказишни талаб қилган.
