«Тоттенхэм» ҳимоячиси Микки Ван де Вен ёзги трансфер ойнасида «Манчестер Юнайтед» футболчисига айланиши мумкин.

Daily Mail хабарига кўра, «МЮ» 25 ёшли футболчининг ҳолатини кузатиб бормоқда. «Қизил иблислар» ҳимоячининг тезлиги, тўп билан муомала қилиш ва тўпни олиб қўйиш маҳоратини юқори баҳоламоқда. Эътиборли жиҳати шундаки, ҳимоячининг «шпорлар» билан шартномасида товон пули белгиланмаган.

Ван де Вен 2023 йилда «Вольфсбург»дан 40 миллион евро эвазига «Тоттенхэм»га ўтган эди.

Жорий мавсумда ҳимоячи барча турнирларда 40 та ўйинда иштирок этиб, ўз ҳисобига еттита гол ва битта голли узатмани ёздириб қўйди. Ван де Веннинг клуб билан амалдаги шартномаси 2029 йилнинг ёзига қадар мўлжалланган. Transfermarkt портали маълумотларига кўра, футболчининг бозор қиймати 65 миллион еврони ташкил этади.