«Манчестер Сити» бош мураббийи Хосеп Гвардиола «Ливерпуль» қанот ҳужумчиси Муҳаммад Салоҳнинг ўйини ҳақида фикр билдирди. Мисрлик футболчи инглиз клубидаги сўнгги мавсумини ўтказмоқда.
«У менга доим бош оғриғи бўлган. «Манчестер Сити»нинг ўйин услуби «Ливерпуль» учун айни муддао эди. Трент Александер-Арнольд ва Эндрю Робертсон ҳам ўша ерда эдилар (Робертсон ҳам мавсум охирида «Ливерпуль»ни тарк этади). У афсона ва менинг чексиз ҳурматимга лойиқ», — дея Гвардиоланинг сўзларини келтиради Sky Sports.
Салоҳ 2017 йилдан бери «Ливерпуль» шарафини ҳимоя қилиб келмоқда. Ушбу давр мобайнида 33 ёшли ҳужумчи барча турнирларда 440 та учрашувда иштирок этиб, 257 та гол ва 122 та голли узатмани амалга оширган.
