Нодирбек Абдусатторов шахмат бўйича нуфузли TEPE Sigeman турниридаги иштирокини ғалаба билан бошлади. Ўзбекистонлик гроссмейстер илк турда қора доналарда хитойлик гроссмейстер Жу Жинерни 37-юришдаёқ мағлуб этди. Швециядаги мусобақани муваффақиятли бошлаган Нодирбек баҳсдан кейинги интервьюсида ўз стратегияси ва асосий мақсади ҳақида сўзлаб берди.

“Рақибимнинг ўйинларини ўрганиб чиқиб, у асосан e4 юришини танлашини ва бу борада тайёргарлиги кучли эканини билдим. Шунинг учун унга сюрприз қилиш мақсадида Каро-Канн ҳимоясини танладим. Бу у учун кутилмаган бўлди”.

Ўйин давомида Абдусатторов рақибнинг устунлигини йўққа чиқариш учун сипоҳларни алмаштириш тактикасини қўллаган. Якунда рақиб вақт танқислигида қўпол хатога йўл қўйди ва Нодирбек бундан унумли фойдаланиб, ғалабани илиб кетди.

Шунингдек, шахматчимиз сўнгги вақтларда Лондон, Вейк-ан-Зее ва Прага турнирларида кетма-кет чемпионликни қўлга киритганини ва бунинг асосий сири барқарорликда эканини қайд этди:

“Мен шунчаки максимал даражада барқарор ўйнашга ҳаракат қиляпман. Бу йил Grand Chess Tour’да қатнашмаётганим сабабли, бошқа нуфузли турнирларда иштирок этишим керак эди. Мен бу ерга айнан Магнус борлиги учун келишга қарор қилдим. Унинг ўйнашини эшитишим билан иштирок этишга дарҳол рози бўлдим”.

Маълумот учун, Нодирбек Абдусатторов мусобақанинг иккинчи турида америкалик Энди Вудвардга қарши дона суради. 3-турда эса жаҳоннинг 1-рақамли шахматчиси Магнус Карлсен билан баҳс олиб боради.