Мадриднинг «Реал» клуби бош мураббийи Альваро Арбелоа Ла Лига доирасидаги «Эспаньол»га қарши ўйин олдидан ўтказилган матбуот анжуманида жамоада характер етишмаслиги ҳақидаги саволга жавоб берди.
«Бизда жуда ёш жамоа шаклланган — буни таркибнинг ўртача ёшига қараб ҳам билиш мумкин. Аммо мен кўп бора таъкидлаганимдек, таркибимизда ўз ишини аъло даражада бажараётган, ёрқин индивидуаллик ва катта тажрибага эга бўлган ажойиб футболчилар ҳам бор.
Сўнгги пайтларда майдонда биз яхшироқ ҳаракат қилишимиз лозим бўлган вазиятлар кузатилди. Бироқ таркибингиз ёш бўлса, ёшликка хос хатолар учраб туради. Ўйлайманки, жамоада кучли етакчилар ва ёрқин шахсиятга эга футболчилар етарли», — деди Альваро Арбелоа.
