«ПСЖ» бош мураббийи Луис Энрике «Арсенал» устози Микель Артетанинг яқинда айтган фикрларига муносабат билдирди.
«Канонирлар» устози «ПСЖ» ва «Бавария» ўртасидаги ўйинни (5:4) «ўзи кўрган энг яхши баҳс» деб атаган эди. Бироқ Артета икки жамоа юлдузларининг бундай юқори формада эканлигини Франция ва Германия чемпионатларидаги рақобат даражаси мавсум якунига келиб футболчиларга дам бериш имконини бериши, Англияда эса бунинг мутлақо иложи йўқлиги билан изоҳлаган эди.
«Ҳар кимнинг ўз шахсий тажрибасига асосланган фикри бор. Ҳақиқат шундаки, Бундеслига ва Лига 1да жамоалар сони камроқ, бу эса юқори даражани сақлаб қолишга ёрдам беради. Бошқа чемпионатларда эса тижорий сабабларга кўра кўпроқ ўйинлар ўтказишга урғу берилади. Қайтариб айтаман, бу борада ҳамманинг ўз қараши бор», – деди Энрике «Лорьян» билан дурангдан (2:2) кейинги матбуот анжуманида.
5 май куни «Арсенал» Чемпионлар лигаси ярим финали доирасида «Атлетико»га қарши жавоб учрашувини ўтказади. «Бавария» эса бир кун ўтиб ўз майдонида «ПСЖ»ни қабул қилади.
