Лондоннинг «Арсенал» клуби устози Микель Артета Англия чемпионатининг 35-тури доирасида «Фулхэм»га қарши кечган уй учрашувидан сўнг ўз фикрларини билдирди. «Канонирлар» 3:0 ҳисобида йирик ғалабани қўлга киритишди.
«Ушбу ғалаба чемпионлик ҳақидаги орзумиз ҳали ҳам тирик эканлигини кўрсатмоқда. Биз бу импульсдан фойдаланишимиз ва олинган энергияни сешанба кунги ўйинга кўчиришимиз керак. Кийиниш хонасидаги муҳитни кузатар эканман, биз тўғри йўналишда кетаётганимизни кўряпман», — дея испаниялик мутахассиснинг сўзларини келтирмоқда The Independent.
Айни дамда «Арсенал» иккинчи ўринда бораётган «Манчестер Сити»дан 6 очкога олдинда, бироқ Хосеп Гвардиола жамоасида захирада иккита ўйин мавжуд. 5 май куни лондонликлар УЕФА Чемпионлар лигаси ярим финали доирасида «Атлетико»га қарши жавоб учрашувини ўтказишади.
