«Арсенал» ҳужумчиси Виктор Дьёкереш «Фулхэм»га қарши кечган ғалабали ўйин ҳақида ўз фикрларини билдирди. Англия чемпионатининг 35-туридан ўрин олган мазкур баҳс 3:0 ҳисобида якунланди ва швециялик форвард дубль қайд этди.
«Менимча, бу ерда ҳам ўйин, ҳам натижа муҳим эди. Биз учрашув тизгинини жуда яхши назорат қилдик. Ҳозирги босқичда биз қолган барча ўйинларда ғалаба қозонишимиз керак. Бугун яхши ўйнаб, 3 очкони қўлга кирита олишимизни кўрсатдик», — дея ҳужумчининг сўзларидан иқтибос келтиради Sky Sports.
«Биз майдонга доим яхши ўйин кўрсатиш ва кўплаб вазиятлар яратишга ишониб тушамиз. Бугун биз буни уддаладик ва ўйиндан завқ олдик. Ишонишдан ҳеч қачон тўхтамаганмиз ва тўхтамаймиз ҳам. Олдинда ҳали ўйинлар кўп, энди навбатдагисига тайёргарлик кўрамиз. Бу ажойиб ҳафта бўлди, жамоа яхши натижаларга эришди. Биз тўғри йўлдамиз ва шу йўлда давом этишимиз керак», — дея қўшимча қилди футболчи.
Айни дамда «Арсенал» 76 очко билан чемпионатда пешқадамлик қилмоқда. «Манчестер Сити» ҳисобида эса 80 очко мавжуд ва «шаҳарликлар»да яна 2 та захира ўйини бор. «Фулхэм» 48 очко билан ўнинчи ўринда бормоқда.
