«Интер Майами» ҳимоячиси Йен Фрэй МЛС чемпионати доирасида «Орландо Сити»га қарши кечган баҳсдаги мағлубиятдан сўнг, жамоа ҳужумчиси Лионель Мессининг футболчиларга йўллаган мурожаати ҳақида сўзлаб берди. Месси жамоаси учрашув давомида 3:0 ҳисобида олдинда бораётган эди, бироқ якунда 3:4 ҳисобида имкониятни бой берди. Лео учрашувдаги голлардан бирига муаллифлик қилди.
«Сардоримиз кийиниш хонасида нутқ сўзлади ва очиғини айтганда, бизга кўп нарсаларни тушунтирди. У кейинги ўйин олдидан бизни руҳлантирди ва бундай натижа қабул қилиб бўлмас эканини айтди. Барчамиз унинг фикрига қўшилдик — бу ҳақиқатан ҳам қабул қилиб бўлмас ҳолат ва бундай воқеа бошқа такрорланмаслиги аниқ», — деди Фрэй.
«Интер Майами» 11 ўйиндан сўнг 19 очко жамғарган. Лионель Месси жамоаси Шарқий конференцияда учинчи ўринни эгаллаб турибди.
