«Интер» А Сериянинг 35-турида «Парма»ни 2:0 ҳисобида мағлуб этиб, Италия чемпиони бўлди. Бу «нерадзурри» тарихидаги 21-чемпионлик унвони ҳисобланади.

Учрашувда ҳисобни майдон эгалари ҳужумчиси Маркус Тюрам 45+1-дақиқада очди. Иккинчи бўлимнинг 80-дақиқасида ярим ҳимоячи Генрих Мхитарян «қора-кўклар»нинг иккинчи голини урди.

Ушбу ғалаба туфайли «Интер» Италия чемпионлигини қўлга киритди. Миланликлар 35 та ўйиндан кейин 82 очко жамғариб, турнир жадвалида биринчи ўринни эгаллаб турибди. Иккинчи ўринда бораётган «Наполи»дан фарқ 12 очкони ташкил этмоқда. «Парма» эса 42 очко билан 12-поғонада жойлашган.

А Серия чемпионликлари сони бўйича «Интер» иккинчи ўринда бормоқда. Рейтингда пешқадам — 36 та совринга эга «Ювентус». «Милан» 19 марта чемпион бўлган, «Женоа»да тўққизта, «Торино», «Болонья» ва «Про Верчелли»да эса етти тадан чемпионлик мавжуд.

Италия — А Серияси, 35-тур
3 май 2026 йил, Милан
«Интер» — «Парма» 2:0
Голлар: Тюрам 45+1, Мхитарян 80.