Мадриднинг «Реал» клуби ҳимоячиси Ферлан Менди Ла Лиганинг 34-тури доирасида «Эспаньол»га қарши кечган сафар ўйинида жароҳат олди. Франциялик латераль учрашувнинг 14-дақиқасидаёқ майдонни тарк этишга мажбур бўлди.
Испания ОАВ тарқатган хабарга кўра, футболчида мушак жароҳати аниқланган. Ферланнинг қачон сафга қайтиши ҳозирча маълум қилинмаган. Эслатиб ўтамиз, мазкур баҳс «қироллик клуби»нинг 2:0 ҳисобидаги ғалабаси билан якунланди. Ҳар иккала голни бразилиялик ҳужумчи Винисиус Жуниор ўз ҳисобига ёздириб қўйди. Жорий мавсумда Менди жами 9 та ўйинда майдонга тушди ва голли ҳаракатлари билан ажралиб тура олмади.
