Миланнинг «Интер» клуби спорт директори Пьеро Аузилио Кристиан Киву қўл остида жамоа муваффақият қозонишига шубҳа қилмаганини таъкидлади.

«Нерадзуррилар» ўтган мавсум финишида муваффақиятсизликка учраб, барча совринлардан маҳрум бўлган эди. Чемпионлар лигаси финалида «ПСЖ»дан қабул қилинган 0:5 ҳисобидаги мағлубиятдан сўнг, Симоне Индзаги бош мураббийлик лавозимини тарк этганди. Янги тайинланган Кристиан Киву эса илк уринишдаёқ жамоани А Серия чемпионлигига етаклаб келди.

«Биз бошиданоқ мавсум муваффақиятли ўтишига шубҳа қилмагандик, чунки жамоамиз юксак маҳоратга ва кучли иродага эга. Кўпчилик «ПСЖ»дан қабул қилинган 0:5 ҳисобидаги мағлубиятдан сўнг буни тезда унутиб қўйди ва бизни бевақт ҳисобдан чиқарди. Киву — ажойиб мураббий. Кўпчилик иккиланган эди, лекин биз унга ишондик», — деди Аузилио QSVS нашрига берган интервьюсида.

«Интер» чемпионат якунига уч тур қолганда «Парма»ни мағлуб этиб (2:0), скудеттони нақд қилди.