Миланнинг «Интер» клуби устози Кристиан Киву ўзига нисбатан айтилган танқидий фикрларга жавоб қайтарди. Якшанба куни «нерадзуррилар» «Парма» устидан ғалаба қозониб (2:0), чемпионат якунига уч тур қолганда А Серия чемпионлигини нақд қилди. Жамоа тажриба етишмаслиги сабабли кўпчилик шубҳа билан қараган мураббий қўл остидаги илк мавсумидаёқ зафарга эришди.

«Мен ўзимга шубҳа билан қарайдиганларга қувватимни сарфламайман, шунчаки клуб учун қўлимдан келган энг яхши нарсани беришга ҳаракат қиламан. Мен олти йил давомида «Интер» ёшлар жамоасида мураббийлик қилдим, сўнгра уч ой «Парма»да ишладим. «Интер» бош мураббийига айланганингизда ҳамма нарса ўзгаради. Футболчиларни руҳлантириш ва рақобатбардошликни сақлаб қолиш учун «керакли тугмачаларни» боса олиш лозим», — деди Киву Sky Sport билан суҳбатда.

Эслатиб ўтамиз, 13 май куни Милан гранди «олтин дубль»ни қайд этиши мумкин — Италия Кубоги финалида жамоа «Лацио»га қарши майдонга тушади.