Milanning «Inter» klubi ustozi Kristian Kivu o‘ziga nisbatan aytilgan tanqidiy fikrlarga javob qaytardi. Yakshanba kuni «neradzurrilar» «Parma» ustidan g‘alaba qozonib (2:0), chempionat yakuniga uch tur qolganda A Seriya chempionligini naqd qildi. Jamoa tajriba yetishmasligi sababli ko‘pchilik shubha bilan qaragan murabbiy qo‘l ostidagi ilk mavsumidayoq zafarga erishdi.
«Men o‘zimga shubha bilan qaraydiganlarga quvvatimni sarflamayman, shunchaki klub uchun qo‘limdan kelgan eng yaxshi narsani berishga harakat qilaman. Men olti yil davomida «Inter» yoshlar jamoasida murabbiylik qildim, so‘ngra uch oy «Parma»da ishladim. «Inter» bosh murabbiyiga aylanganingizda hamma narsa o‘zgaradi. Futbolchilarni ruhlantirish va raqobatbardoshlikni saqlab qolish uchun «kerakli tugmachalarni» bosa olish lozim», — dedi Kivu Sky Sport bilan suhbatda.
Eslatib o‘tamiz, 13 may kuni Milan grandi «oltin dubl»ni qayd etishi mumkin — Italiya Kubogi finalida jamoa «Lasio»ga qarshi maydonga tushadi.
