Миланнинг «Интер» клуби бош мураббийи Кристиан Киву жамоанинг А Сериядаги муваффақияти ҳақида тўхталиб ўтди. 35-тур доирасида «Парма» устидан қозонилган ғалаба (2:0) «нерадзуррилар»ни таъқибчилари учун етиб бўлмас даражага олиб чиқди.

«Асосий хизмат клуб, футболчилар ва мухлисларга тегишли. Мен ўз мураббийлар штабим билан бирга жамоага нима керак бўлса, шуни бериш учун бор кучимни ишга солдим. Биргаликда ажойиб ишни амалга оширдик. Мен «Интер»да 19 йилни ўтказдим ва бу ғалаба мен учун ҳамма нарсани англатади. Фарзандларим Миланда туғилган, мен бу ажойиб шаҳарда қарийб 20 йилдан бери яшаб келяпман ва бу ерда бахтлиман. Аввалига менга «Интер» либосида ўйнаш ва ғолиб бўлиш шарафи насиб этганди, кейин жамоа мураббийи бўлдим, энди эса мураббий сифатида ҳам ғалаба қозондим!» — деди Киву Sky Sport нашрига берган интервьюсида.

Руминиялик мутахассис ўтган йилнинг ёзида Симоне Индзагининг ўрнига бош мураббий этиб тайинланган эди.