«Ньюкасл» ва Англия терма жамоасининг собиқ ҳужумчиси Алан Ширер Беньямин Шешконинг «Ливерпуль» дарвозасига урган голи борасида ўз фикрини билдирди. «Манчестер Юнайтед» футболчиси АПЛнинг 35-тури доирасидаги баҳсда рақиб дарвозасини ишғол қилди ва ушбу учрашув унинг жамоасининг 3:2 ҳисобидаги ғалабаси билан якунланди.

Зарбадан олдин футболчи тўпга қўли билан енгил тегиб кетгани сабабли, бу гол қизғин баҳсларга сабаб бўлди. IFAB қоидаларига кўра, агар ҳужумчи голни қўли билан урса ёки тўп қўлга текканидан сўнг дарҳол дарвозага йўлланса, ҳатто бу тасодифан содир бўлган бўлса ҳам, гол бекор қилиниши керак. Шунга қарамай, VAR ҳакамлари узоқ давом этган текширувдан сўнг голни инобатга олишга қарор қилишди.

«Мен бундай голлар бекор қилинишини хоҳламайман. Тўғрисини айтсам, қўл билан ўйнаш борасидаги қоидаларни, хусусан, мана шу қоидани ҳам мутлақо мантиқсиз деб ҳисоблайман. Лекин изчиллик ва қоидаларнинг тўғри қўлланиши ҳақида гапирадиган бўлсак, тўп унинг қўлига тегди. Тўп Шешконинг чап қўлига теккани сабабли унинг ҳаракат йўналиши ўзгарганини кўриш мумкин. Бу шунчаки енгил тегиниш эди, аммо агар қоидаларга амал қилинса, бу гол бекор қилиниши керак эди», — дея Ширернинг сўзларини келтиради Daily Star.

Айни дамда «Манчестер Юнайтед» учинчи, «Ливерпуль» эса тўртинчи ўринни эгаллаб турибди.