«Барселона» марказий ҳимоячи Алессандро Бастони трансфери бўйича Миланнинг «Интер» клуби билан музокаралар ўтказади. Италиялик футболчи анчадан бери Каталония грандининг қизиқишлари доирасида бўлиб келмоқда, турли манбалар эса ўйинчининг «кўк-анорранглилар» сафига қўшилиш истаги борлиги ҳақида бир неча бор хабар берган.

Diario Sport нашрининг маълумотига кўра, «Барселона» тез орада Бастони бўйича «нерадзурри» билан расмий музокараларни бошлайди. «Интер» 27 ёшли футболчининг сотувидан камида 60 миллион евро ишлаб олмоқчи, бироқ Ла Лига гранди нархни туширишга ҳаракат қилади – эҳтимол, келишувга ўз таркибидаги футболчилардан бирини қўшиш орқали.

Якшанба куни «Интер» муддатидан олдин Италия чемпионига айланди. Клуб спорт директори Пьеро Аузилио интервью давомида Бастонининг келажаги ҳақидаги саволга жавоб берар экан, трансфер амалга ошишини кутмаслик кераклигига шаъма қилди.