Машҳур собиқ футболчи Эммануэль Пети Мадриднинг «Реал» клубига тегишли бўлган ва айни дамда ижара асосида «Лион»да тўп сураётган Эндрикнинг ўйинидан ҳайратда эканлигини билдирди.

19 ёшли ҳужумчи ўйин амалиётига эга бўлиш учун январь ойида Францияга йўл олган эди ва у ерда ўзини кўрсатишга улгурди. Бразилиялик футболчи «қаймоқранглилар» таркибига қайтгач, асосий жамоада имкониятга эга бўлиши ёки бўлмаслиги ҳозирча номаълум.

«Эндрик жуда иқтидорли, аммо баъзида худди ёввойи отдай бошқариб бўлмас даражада ҳаракат қилади. Майдонда вақти-вақти билан ҳаддан ташқари худбинлик қилиши мумкин, лекин унинг улкан салоҳияти яққол кўриниб турибди. Бу йигит — ҳақиқий олмос, унга ривожланиш учун тўғри муҳит керак. Унинг қобилиятларини билган ҳолда, мен уни «Арсенал»да кўришни истардим», — дейди ўз вақтида «канонирлар» сафида тўп сурган Пети.

Маълумот учун, Эндрик «Лион» сафидаги 19 та ўйинда 8 та гол ва 7 та голли узатмани ўз ҳисобига ёздириб қўйди.