«Реал Мадрид»нинг собиқ бош мураббийи Фабио Капелло бразилиялик Роналдонинг Мадрид клубидаги фаолияти давомида профессионаллик даражаси етарли бўлмагани ҳақида гапириб берди.

Роналдо 2002 йилдан 2007 йилгача «Реал» шарафини ҳимоя қилган.

«Роналдо Мадридга келганида ундан: "Жаҳон чемпионатида ғолиб чиққанингда вазнинг қанча эди?" деб сўрадим. У: "84 килограмм", деб жавоб берди. "Ҳозир-чи?" десам, "94", деди. У ёмон ўрнак кўрсатарди. Кераклича машқ қилмас ва жамоадошларини ҳам бунга рағбатлантирмас эди. Шу сабабли президент билан у билан хайрлашишга қарор қилдик.

Берлускони менга қўнғироқ қилиб: "Роналдонинг ишлари қалай?" деб сўради. Мен эса: "Президент, у яхши футболчи. Лекин нотўғри ўрнак бўляпти, доимий равишда базмларга боради, вазн тўплаган. У фақат аёллар ҳақида ўйлайди", деб жавоб бердим. Эртаси куни эса Gazzetta нашрида: "Роналдо «Милан»га ўтмоқда", деган хабар чиқди», — деди Капелло.