«Интер» бош мураббийи ёрдамчиси Александар Коларов Скудетто қўлга киритилгач, ўтган мавсумдаги Чемпионлар лигаси финалида учралган мағлубиятни ёдга олди.

Эслатиб ўтамиз, «Интер» A Серия 35-турида «Парма»ни 2:0 ҳисобида мағлуб этиб, муддатидан олдин Италия чемпионига айланди. Ўтган мавсумда «нерадзурри» ЕЧЛ финалида «ПСЖ»га йирик (0:5) ҳисобда имкониятни бой берган эди.

«Биз бошиданоқ қилаётган ишимизга ишонгандик. Ўйинчилар талабларимизни аъло даражада бажаришди. Улар билан ишлаш жуда осон бўлди. Бир нечта мағлубиятлардан сўнг улар дарҳол ўзларини кўрсатиб, керакли реакцияни бера олишди.

Ўтган мавсумдаги ЕЧЛ финалидаги мағлубият ҳақида бир оғиз сўз қўшимча қилсам. Футболда бундай ҳолатлар бўлиб туради. Журналистлар буни мутлақ фалокат деб аташди, лекин бошқа жамоалар ҳатто финалгача ҳам етиб бора олишмаганди. Бошқалар диванда ўтириб «Интер»нинг ўйинини томоша қилишди. Футболчилар аллақачон ўзларини кўрсатиб бўлишган. Биз нафақат уларнинг маҳоратидан, балки иродасидан ҳам фойдаландик. Фарқни ҳақиқий эркаклар белгилаб беради», — деди Коларов.