"Ливерпуль" клуби "ПСЖ" ҳимоячиси Мамаду Сакони ҳарид қилмоқчи. Бу ҳақда Le Parisien нашри хабар бермоқда.
Инглиз клуби парижликлар тарбияланувчисига жиддий равишда қизиқиб қолган ва бу сафар "ПСЖ"га 13 миллион евродан кўпроқ таклиф қилишга ҳам тайёрлар.
Коло Туренинг жароҳат олиши билан "Ливерпуль" ёзги трансфер ойнаси ёпилгунга қадар бир қатор трансферлар ишини якунлашга шошиб қолган. "ПСЖ" ўз жавобини бугун бериши кутилмоқда.
Сако билан клубнинг шартномаси 2014 йилда якунига етади. Ўйинчининг ўзи эса доимий ўйин амалиётига эга бўлиш мақсадида клубини ўзгартиришни хоҳламоқда. Аммо жамоа раҳбарлари уни бирор клубга ижарага бериш эвазига ўзаро шартномани узайтириш вариантлари ҳақида кўпроқ ўйламоқдалар.
Саконинг хизматларига Италияда "Милан" ва "Рома" клублари қизиқаётгани борасида маълумотлар бор. Миланликлар ижара шартларини кўриб чиқишга тайёрликларини билдирган бўлсалар, римликлар уни ҳарид қилиш учун 5 миллион евродан ортиғини тўлашга тайёр эмаслар.
