Душанба куни Италия А Сериясида 35-турга иккита ўйин билан якун ясалди. Сафарда муваффақиятсиз ўйин кўрсатган «Фиорентина» «Рома»дан жавобсиз тўртта тўп ўтказиб юборди.
Бу римликлар учун А Серия доирасида ўз уйларида мағлубиятсиз кечаётган кетма-кет 11-учрашув бўлди. Ушбу ўйинларнинг 8 тасида ғалаба қайд этилган бўлса, 3 таси дуранг билан якунланган. «Рома» ўз майдонида сўнгги бор 2025 йилнинг 30 ноябрида «Наполи»га имкониятни бой берган эди (0:1).
Ҳозирда «Рома»нинг ушбу кўрсаткичи А Сериядаги энг яхши серия бўлиб турибди. Бироқ «Интер» ҳам худди шундай натижага эга — миланликлар ҳам ўз уйларида кетма-кет 11 ўйиндан бери мағлубият нималигини билишмаяпти.
