«Барселона» ва Испания терма жамоасининг 18 ёшли юлдузи Ламин Ямал жароҳатидан тикланишнинг янги босқичига ўтди. Бу ҳақда Cadena SER нашри хабар бермоқда.
Маълумотларга кўра, ҳужумчи айни дамда клуб қароргоҳида тренажёр залидаги машғулотлар билан бирга, майдонда ҳам индивидуал тарзда ишлашни бошлаган. Футболчи 22 апрель куни «Сельта»га қарши баҳсда тизза ости пайидан жароҳат олиб, мавсумнинг қолган қисмини ўтказиб юбориши аниқ бўлган эди.
Ямалнинг асосий мақсади — июнь ойида Шимолий Америкада бошланадиган Жаҳон чемпионати-2026 турниригача тўлиқ сафга қайтиш.
Испания терма жамоаси бош мураббийи Луис де ла Фуэнте ва «Барселона» шифокорлари футболчининг тикланиш жараёнини эҳтиёткорлик билан назорат қилишмоқда. Режага кўра, Ямал мундиалнинг гуруҳ босқичидаги дастлабки икки ўйинни (Кабо-Верде ва Саудия Арабистонига қарши) ўтказиб юбориши ва учинчи турдаги Уругвайга қарши муҳим баҳсгача 100 фоиз тайёр бўлиши кутилмоқда.
