«Арсенал»нинг собиқ футболчиси Пол Мерсон «Челси» клубида жорий мавсумда юзага келган ҳолат ҳақида ўз фикрлари билан ўртоқлашди.

«Мен «Челси» қандай қилиб бундай аҳволга тушиб қолганини тушунолмаяпман ва ростни айтсам, чиқиш йўлини ҳам кўрмаяпман. Ҳатто улар футболчилардан халос бўлишса ҳам, бу молиявий фэйр-плей нуқтаи назаридан қандай кўринишга эга бўлади? Алехандро Гарначо кутилган ишончни оқламади. Улар у учун сарфланган пулларни қайтариб ололмайдилар. Энцо Фернандес эса, чамаси, ўзи «Реал»га ўтишни истаётганга ўхшайди. Демак, у кетмоқчи, лекин у яна бир бор Жаҳон чемпиони бўлмаса, клуб у учун қандай қилиб 100 миллион фунт стерлинг олиши мумкинлигини тасаввур қилолмайман.

Пул қаердан келади? Бу «Челси» учун қандай қилиб иш бериши мумкин? Шунчаки ўтириб олиб, улар бир тўда ўйинчиларни сотишади ва ҳаммасини нолдан бошлашади, деб айтолмайман. Агар улар қўйиб юбормоқчи бўлган футболчилар бўлса, катта эҳтимол билан, кетгани учун уларга товон пули тўлашларига тўғри келади. Бу эса пул дегани. Агар янги ўйинчилар олмоқчи бўлишса, бу ҳам харажат талаб қилади. Улар боши берк кўчага кириб қолишган», — деди Мерсон Sky Sports телеканалига берган интервьюсида.

Ҳозирда «Челси» Англия чемпионати турнир жадвалида 48 очко билан тўққизинчи ўринда бормоқда.