«Арсенал» ва «Барселона» клубларининг собиқ ҳужумчиси Тьерри Анри Португалия терма жамоаси ҳужумчиси Криштиану Роналду ва Аргентина терма жамоаси сардори Лионель Мессини таққослаш ҳақида ўз фикрларини билдирди.
«Бу хато. Нега одамлар уларни ажратишга уринади, агар ҳар иккисининг ўйинидан завқланиш мумкин бўлса? Албатта, мен Лео билан бирга ўйнаганман ва сентиментал сабабларга кўра танловни унинг фойдасига қиламан, аммо бу мен ҳеч қачон Криштиануга қарши чиқаман дегани эмас. Уларнинг ҳар бири — футбол чўққиси. Улар бошқа сайёрадан. Улар бир-бирини янада кучли қилди, худди Рафаэль Надаль ва Роджер Федерер, Ален Прост ва Айртон Сенна каби. Криш ва Лео рақобатдан ташқари», — деди Анри Marca нашрига берган интервьюсида.













