Айни дамда ижара асосида «Барселона»да тўп тепаётган «Манчестер Юнайтед» ҳужумчиси Маркус Рэшфорд фаолиятини «Арсенал»да давом эттириши мумкин. Бу ҳақда журналист Крис Уилер хабар бермоқда.

Манба берган маълумотларга кўра, «тўпчилар» ёзги трансфер ойнаси олдидан Рэшфорд билан боғлиқ вазиятни диққат билан кузатиб боришмоқда. Тарқалган миш-мишларга кўра, «Барселона» вингер учун 30 миллион евро тўлашни истамаяпти, бироқ «Манчестер Юнайтед» нарх масаласида ён бермоқчи эмас.

«Кўк-анорранглилар» таркибида Рэшфорд барча мусобақаларда 46 та ўйинда майдонга тушди, 13 та гол урди ва 14 та голли узатмани амалга оширди. Қайд этиш жоизки, 28 ёшли ҳужумчининг «Манчестер Юнайтед» билан шартномаси 2028 йилгача мўлжалланган.

Эслатиб ўтамиз, «Арсенал»нинг навбатдаги учрашуви 10 май куни соат 18:30 да «Вест Хэм»га қарши бўлиб ўтади.