Американинг Fox телеканали ва Indeed иш қидириш платформаси 50 минг доллар маош эвазига “Жаҳон чемпионатининг бош томошабини” вакансиясини эълон қилди.

“Футбол бўйича Жаҳон чемпионати тарихий турнир бўлади, бу эса ходимларни танлашда ҳам тарихий ёндашувни талаб қилади. Битта ашаддий номзод ушбу гўзал ўйинни белгилаб берувчи ҳар бир ҳикояни, ҳар бир жамоани ва ҳар бир ҳаяжонли лаҳзани ҳис қилиш ва бошдан кечириш учун умридаги энг яхши ишга эга бўлади”, дейди Fox Sports телеканали маркетинг бўйича президенти Роберт Готтлиб.

Бўлажак ходимнинг мажбуриятларига турнирдаги барча 104 та ўйинни томоша қилиш, контент яратиш, шунингдек, Таймс-сквердаги (Нью Йорк) ўйинлар трансляцияси пайтида ўтказиладиган тадбирларда қатнашиш киради. Маълумот учун, гуруҳ босқичининг сўнгги тур ўйинлари бир вақтда ўтказилади.

Эслатиб ўтамиз, Жаҳон чемпионати 11 июндан 19 июлга қадар АҚШ, Канада ва Мексика ҳудудларида бўлиб ўтади.

Маълумот ўрнида, Ўзбекистон терма жамоаси гуруҳ босқичидаги илк ўйинини Мексикада ўтказади, қолган икки учрашув эса АҚШдаги стадионларда бўлиб ўтади. “Оқ бўрилар” 18 июнь куни биринчи турда Колумбияга қарши майдонга тушади. Ушбу учрашувга Мексика пойтахтидаги “Ацтека” стадиони мезбонлик қилади. Жамоа иккинчи тур доирасида 23 июнь куни Криштиану Рональду бошчилигидаги Португалия терма жамоаси билан ўйнайди. Мазкур беллашув АҚШдаги “Хюстон” стадионида ўтказилиши белгиланган. Гуруҳдаги сўнгги учрашув 28 июнь куни “Атланта” стадионида Конго Демократик Республикасига қарши бўлиб ўтади.