«Бавария» ўз майдонида «ПСЖ»ни мағлуб эта олмади — учрашув 1:1 ҳисобидаги дуранг билан якунланди. Парижликлар икки ўйин натижасига кўра 6:5 ҳисобида ғалаба қозониб, Чемпионлар лигаси финалига йўл олишди. Жавоб ўйинидан сўнг «Бавария» дарвозабони Мануэль Нойер ўз фикрларини билдирди.

«Менимча, бугун ҳужумда бизга «қотил инстинкти» етишмади. Вазиятларимиз бўлди, лекин яққол голли имкониятлар у қадар кўп эмас эди. Бундай лаҳзалар юзага келганда... «ПСЖ»га қаранг — улар биринчи ўйинда ҳақиқий «қотиллардек» ҳаракат қилишди. Бугун бизга айнан мана шу нарса етишмади.

Биз финалга яқин эдик, бироқ ишни охиригача етказа олмадик. Афсуски, жуда кеч гол урдик. Яна бир вазият яратиш ёки стандарт вазият юзага келтириш учун вақтимиз қолмади. Жуда кеч эди. Стадион биз билан бирга эди, биз ҳам тайёр эдик, лекин «ПСЖ» жарима майдончаси ичида бизга совуққонлик ва вазиятлардан фойдаланиш етишмади», — деди Нойер DAZN нашрига.