«Бавария» ҳужумчиси Харри Кейн жамоасининг Чемпионлар лигасини тарк этганига муносабат билдирди. Мюнхен гранди икки ўйин натижасига кўра «ПСЖ»га имкониятни бой берди (5:6). «Альянц Арена»да бўлиб ўтган жавоб учрашуви 1:1 ҳисобидаги дуранг билан якунланди.
«Бу жуда оғир. Бугун бизда кўпроқ гол уриш ва финалга чиқиш учун етарлича вазиятлар бўлганди. Энди бор эътиборимизни Германия Кубоги финалига тайёргарликка қаратишимиз керак. Биз ҳали ҳам мавсумни «олтин дубль» билан якунлашимиз мумкин», — дея журналист Флориан Плеттенберг уй учрашувининг 94-дақиқасида мюнхенликларнинг ягона голига муаллифлик қилган Кейннинг сўзларини келтирди.
Эслатиб ўтамиз, «Бавария» Бундеслигада чемпионликни аллақачон нақд қилиб қўйган, Германия Кубоги финалида эса «Штутгарт»га қарши майдонга тушади.
