«Ливерпуль» клуби яқин йиллар ичида уй учрашувлари учун чипталар нархини ошириш борасидаги режаларига ўзгартириш киритилганини эълон қилди.
Аввалроқ клуб келаси мавсумдан бошлаб чипталар нархини 3 фоизга оширишни, шунингдек, 2027/28 ва 2028/29 йилги мавсумларда инфляцияга қараб нархларни янада кўтаришни режалаштирган эди. Ушбу қарор «қизиллар» мухлисларининг кескин норозилигига ва турли акцияларга сабаб бўлди.
Бугун «Ливерпуль» янгиланган режани эълон қилди:
2026/2027 йилги мавсум учун нархлар, аввал келишилганидек, 3 фоизга ошади.
2027/2028 йилги мавсум учун эса нархлар музлатиб қўйилади (ўзгаришсиз қолади).
Келгуси йиллар учун мўлжалланган режалар «Ливерпуль» Мухлислар кенгаши билан алоҳида муҳокама қилинадиган бўлди.
