«Барселона» шу ёзда Чемпионшип вакили «Бирмингем» билан ўртоқлик учрашуви ўтказишни режалаштирмоқда.
Янги мавсумга тайёргарлик доирасида каталонияликлар Англия терма жамоасининг Бертон-апон-Трент шаҳрида жойлашган машғулот марказида тахминан икки ҳафта вақт ўтказишади. «Барселона» у ерга 27 июль куни етиб бориши кутилмоқда. «Бирмингем»га қарши ўйиннинг аниқ санаси ҳозирча белгиланмаган.
Ханси Флик жамоаси Англиядаги йиғиндан сўнг яна иккита назорат ўйини ўтказиши режалаштирилган:
Биринчиси — Кения пойтахти Найробида;
Иккинчиси — Марокашда бўлиб ўтади.
Таъкидланишича, ЖЧ-2026 сабабли «Барселона» бу йил тўлиқ форматдаги хорижий турнени амалга оширмайди.
