«Ливерпуль» яна бир йирик трансфер кампаниясини ўтказиш ва камида беш нафар янги футболчини таркибга қўшиб олишни режалаштирмоқда. Бу ҳақда The Athletic нашри хабар берди.
Нашр журналисти Жеймс Пирснинг маълум қилишича, Муҳаммад Салоҳ ва Энди Робертсон жамоани тарк этганидан кейин клуб янги мавсум олдидан таркибни жиддий янгиламоқчи. Асосий эътибор ҳужум чизиғи, ярим ҳимоя ва ҳимоянинг икки қанотини кучайтиришга қаратилган.
Қайд этилишича, «Ливерпуль» Салоҳ ўрнига ўнг қанот ҳужумчисини қидирмоқда. Шунингдек, Уго Экитике ахилл пайи оғир жароҳат олгани сабабли яна бир ҳужумчи олиб келиш режалаштирилган. Бундан ташқари, клуб марказий ярим ҳимоя ҳамда ўнг ва чап қанот ҳимоячилари позицияларини ҳам кучайтириш вариантларини кўриб чиқмоқда.
Эҳтимолий номзодлар қаторида Ян Дьоманде, Энтони Гордон, Адам Уортон, Алехандро Бальде ва Дензел Думфрис бор.
Эслатиб ўтамиз, ўтган ёзда мерсисайдликлар таркибни янгилаш учун тахминан 440 миллион фунт сарфлаган эди.













