«ПСЖ» раҳбарияти Чемпионлар Лигаси ярим финалининг жавоб учрашувидаги ҳакамлик борасида «Бавария» томонидан билдирилган норозиликларни тушунмади.

Эслатиб ўтамиз, аввалроқ мюнхенликлар спорт директори Макс Эберль «ПСЖ»га қарши иккинчи ўйиндаги (1:1, биринчи баҳс – 4:5) Жоау Педру Пиньейрунинг ишини кескин танқид қилган эди.

L’Équipe нашрининг хабарига кўра, Париж клубидаги баъзиларнинг фикрича, агар дарвозабон Мануэль Нойернинг маҳорати бўлмаганида, жавоб ўйини йирик ҳисобдаги мағлубиятга айланиб кетиши мумкин эди. Психологик жиҳатдан «ПСЖ» рақибни мувозанатдан чиқариб юборганини ҳис қилган.

Венсан Компани ва Германия клуби раҳбариятининг Пиньейруга нисбатан ғазаби Париж клубининг юқори доираларида тушунмовчилик билан қабул қилинди. Уларнинг фикрича, «Бавария» «Реал»га қарши бўлиб ўтган чорак финалнинг иккинчи ўйинида ҳакамга катта босим ўтказиш орқали Эдуардо Камавинганинг майдондан четлатилишига эришган эди. Бу гал эса улар худди шундай ишни такрорлай олишмади.