«Арсенал» бош мураббийи Микель Артета Англия Премьер-лигасининг 36-туридан ўрин олган «Вест Хэм Юнайтед»га қарши бўлажак ўйин (10 май) ҳақида ўз фикрларини билдирди.

«Бўлажак ўйиннинг иккала жамоа учун нақадар муҳимлигини тушуниб турибмиз. Нимани истаётганимизни ва ғалаба қозониш учун қандай ишларни амалга оширишимиз кераклигини яхши англаймиз.

Мен ҳар бир кундан завқ оляпман, йигитлар ва клуб ходимлари билан ишлаш менга ҳузур бағишлайди. Ўз ишимни яхши кўраман, бу мен учун катта шараф. Ўйинларга тайёргарлик кўриш, ҳозирги ҳолатда эса «Вест Хэм» билан баҳсга ҳозирлик кўриш менга ёқади. Нима қилишимиз кераклиги, футболчилар билан қандай қилиб энг яхши ўзаро тушунишни шакллантириш, қандай ўйин вазиятларини яратиш ва агар керак бўлса, ўйин тизгинини қандай ўзгартириш ҳақида ўйлаш — буларнинг барчаси менга завқ беради», — дея Артетанинг сўзларини келтиради «канонирлар» расмий сайти.

Эслатиб ўтамиз, «Вест Хэм» ва «Арсенал» ўртасидаги учрашув 10 май куни Тошкент вақти билан 20:30да бошланиши режалаштирилган.