Аргентина терма жамоаси ҳужумчиси Лионель Месси Неймар Бразилия терма жамоаси таркибида Жаҳон чемпионатига бориши керакми ёки йўқми, деган саволга жавоб берди.

«Менинг фикрим холис бўла олмайди, чунки Неймар — менинг дўстим. Лекин мен унинг Жаҳон чемпионатига боришини истардим. У ҳаётида кўплаб гўзал воқеалар содир бўлишига лойиқ. У бунга, жумладан, қандай инсон эканлиги билан ҳам лойиқдир. Жаҳон чемпионатларида биз доимо энг зўр футболчиларни кўришни истаймиз. Неймар — ана шундайлар қаторида. Умид қиламанки, у Бразилия ва бутун дунё учун қандай аҳамиятга эга эканлиги туфайли ҳам у ерда бўлади», — дея Мессининг сўзларини келтиради The Touchline.

Эслатиб ўтамиз, март ойида Карло Анчелотти Неймарни Бразилия терма жамоасига чақирмаган эди.