«Манчестер Сити» бош мураббийи Хосеп Гвардиола ўз жамоаси футболчиларида эркинлик йўқлиги ҳақидаги мифларни рад этишда давом этмоқда. Испаниялик мутахассис унинг вазифаси футболчилар ҳаракатини қатъий алгоритмга бўйсундириш эмаслигини тушунтириб берди.

«Албатта, ҳар кимнинг ўз роли бор — айниқса, интизом талаб этиладиган ҳимояда. Бироқ, тўп бизда бўлганида, мен ҳеч қачон футболчига: Ўнгга юр, чапга юр, у ерга пас бер, зарба бер ёки тўпни узатиб бер, деб айтмайман. Ҳеч қачон! Менинг вазифам — футболчиларни майдонда шундай жойлаштиришдан иборатки, уларда тўп билан тўғри қарор қабул қилиш учун имкон қадар кўпроқ вақт ва бўш жой бўлсин. Бошқа ҳеч нарса эмас», — дея тушунтирди Гвардиола «Брентфорд» билан ўйин олдидан ўтказилган матбуот анжуманида.

Айни дамда «шаҳарликлар» Премьер-лига турнир жадвалида иккинчи ўринда боришмоқда ва захирасида битта ўйин бўлгани ҳолда «Арсенал»дан беш очко ортда қолишмоқда.