«Манчестер Сити» бош мураббийи Хосеп Гвардиола Чемпионлар лигасига муддатидан олдин йўлланма олишнинг муҳимлигини таъкидлади. «Шаҳарликлар» худди «Арсенал» ва «Манчестер Юнайтед» каби келаси мавсумда энг нуфузли еврокубокда иштирок этишини нақд қилиб бўлишган.
«Биз Чемпионлар лигасига олдиндан квалификация қилдик ва бу жуда муҳим. Ўтган турда «Ливерпуль» устидан қозонилган ғалабадан кейин «Манчестер Юнайтед» Чемпионлар лигасига чиққанини қандай нишонлаганини бир кўринг!» — деди испаниялик мураббий матбуот анжуманида.
Учинчи ўринда бораётган «қизил иблислар»дан фарқли ўлароқ, «Сити» ҳали ҳам чемпионлик учун курашмоқда. Гвардиола жамоаси 71 очко билан иккинчи ўринда бормоқда ва захирасида битта ўйин бўлгани ҳолда пешқадам «Арсенал»дан беш очко ортда қолмоқда.
