«Барселона» ҳимоячиси Андреас Кристенсен Мадриднинг «Реал» клубига қарши баҳсгача майдонга қайтишга шошилмоқда. Бу ҳақда Diario SPORT нашри хабар бермоқда.
Бироқ, даниялик футболчининг «эль-класико»га қадар сафга қайтиши эҳтимоли паст деб баҳоланмоқда. Кристенсен 29 апрелдан бери машғулот ўтказаётган бўлса-да, «Барселона» унинг тиззасидан олган жароҳатидан сўнг эҳтиёткорлик чораларини кўрмоқда. Ҳаттоки ҳимоячига тиббий ходимлар томонидан ўйнашга рухсат берилган тақдирда ҳам, унинг «Реал»га қарши баҳсда майдонга тушиши амримаҳол.
Кристенсеннинг «Барселона»даги келажаги ноаниқлигича қолмоқда. Клуб анча олдин унга маоши камайтирилган янги шартнома таклиф қилган, бироқ футболчи ҳалигача жавоб бермаган.
Ла Лиганинг 35-тури доирасидаги «Барселона» ва «Реал» ўртасидаги тўқнашув 10 май куни бўлиб ўтади.
