«Ливерпуль» бош мураббийи Арне Слот жамоасининг жорий Чемпионлар лигасидаги натижалари ҳақида ўз фикри билан ўртоқлашди. Мерсисайдликлар мусобақадаги иштирокини чорак финал босқичида, Франциянинг «ПСЖ» клубига имкониятни бой бериб якунлашган эди.
«Биз Чемпионлар лигасининг умумий босқичида 3-ўринни эгалладик, плей-оффда «Галатасарой»ни мағлуб этдик ва «ПСЖ» томонидан мусобақадан чиқариб юборилдик. Ҳозирда икки ўйин натижасига кўра «ПСЖ»ни мағлуб эта оладиган бирорта жамоа мавжуд эмас», — дея Слотнинг сўзларини келтиради The Touchline.
30 май куни Чемпионлар лигаси финали бўлиб ўтади ва унда «ПСЖ» «Арсенал» билан тўқнаш келади. Англия чемпионатида эса «Ливерпуль» 35 ўйинда 58 очко жамғарган ҳолда турнир жадвалида тўртинчи ўринни эгаллаб турибди.
