Мадриднинг «Реал» клуби марказий ҳимоячиси Эдер Милитао жамоадошлари орасида унда энг кучли таассурот қолдирган футболчининг номини айтди.
28 ёшли бразилиялик футболчи «қаймоқранглилар»нинг 2021 йилда жамоани тарк этган собиқ сардори Серхио Рамосни алоҳида таъкидлаб ўтди.
«Мени ким ҳаммадан кўпроқ ҳайратда қолдирган? Серхио Рамос — ўзининг техникаси, кучи ва етакчилик қобилиятлари билан. Бу йигит бошқа даражада эди. У билан бирга машғулот ўтказганимда: Мен ҳам худди шундай ҳимоячи бўлишим керак, деб ўйлаганимни эслайман», — дея Милитаонинг интервьюсидан иқтибос келтиради Madrid Zone.
Март ойи охирида Рамос 40 ёшни қарши олди. Испаниялик футболчи ҳалигача фаолиятини якунлагани йўқ, бироқ салкам ярим йилдан бери клубсиз қолмоқда.
