Эрон футбол федерацияси (FFIRI) 2026 йилги Жаҳон чемпионатида терма жамоа иштирокини кафолатлаш учун ташкилотчилар олдига 10 та талаб қўйди. Бу ҳақда Le Parisien нашри федерация баёнотига таяниб хабар бермоқда.
Эрон томони талаб қилган шартлар қаторидан Ислом инқилоби қўриқчилари корпусида хизмат қилган футболчи ва мураббийларга виза берилиши, мамлакат байроғи ва мадҳиясига ҳурмат билан ёндашиш, шунингдек, аэропорт, меҳмонхона ва стадионларга бориш йўналишларида юқори даражадаги хавфсизликни таъминлаш каби бандлар ўрин олган.
«Биз Жаҳон чемпионатида албатта иштирок этамиз, бироқ мезбон давлатлар бизнинг хавотирларимизни инобатга олиши шарт. Турнирда қатнашамиз, лекин ўз эътиқодимиз, маданиятимиз ва қарашларимиздан воз кечмаймиз», — дейилади федерация баёнотида.
Эслатиб ўтамиз, ЖЧ-2026 шу йилнинг 11 июнидан 19 июлига қадар АҚШ, Канада ва Мексикада бўлиб ўтади. Аввалроқ Эрон спорт вазири Аҳмад Дунёмалий ФИФАдан турнирни Америкада ўтказиш ҳақидаги қарорни бекор қилишни талаб қилган эди. Шунга қарамай, ОФК бош котиби Виндзор Жон Эрон терма жамоаси турнирда қатнашиш ниятида эканини тасдиқлаган.
Маълумот учун, Эрон гуруҳ босқичида Янги Зеландия, Бельгия ва Миср билан куч синашиши керак. Ушбу гуруҳдаги барча ўйинлар АҚШ ҳудудида ўтказилиши режалаштирилган.
